Pse hoqi implantet e gjoksit? Victoria Beckham zbulon arsyen e transformimit të saj personal dhe profesional

Victoria Beckham, ish-anëtarja e grupit legjendar Spice Girls dhe sot një nga emrat më të njohur të modës botërore, ka zbuluar për herë të parë arsyen pse vendosi të heqë implantet e gjoksit.

Në një intervistë për “The Sun”, 51-vjeçarja tregoi se ky vendim nuk ishte thjesht estetik, por pjesë e një transformimi të madh personal dhe profesional.

Sipas saj, pikëkthesa erdhi gjatë bashkëpunimit me dizajnerin e njohur francez Roland Mouret, i cili luajti një rol vendimtar në formimin e karrierës së saj në botën e modës.

“Unë nuk e di ku shkuan ato gjinj, por ata ikën. Ishte definitivisht puna me Roland që bëri ndryshimin. Ai është kaq i shkëlqyer dhe nuk do të kisha një karrierë në modë nëse nuk do të ishte për të”, tha Beckham me sinqeritet.

Ajo theksoi se hoqi implantet për të qenë më autentike dhe për të mos ndjerë presionin që duhej të përfaqësonte një imazh të caktuar për t’u marrë seriozisht. “Ishte një mënyrë për të kuptuar se nuk kam nevojë të jem dikush tjetër. Doja të ndihesha vetvetja”, shtoi ajo.

Beckham foli edhe për kalimin e saj nga muzika në modë, duke kujtuar fillimet pas suksesit botëror me Spice Girls. Sipas saj, Mouret ishte personi që e pa potencialin e saj përtej imazhit të “Posh Spice” dhe besoi tek aftësitë e saj kreative.

“Roland pa diçka, nuk e di çfarë, por ne u lidhëm dhe ai besoi tek unë”, tregoi ajo edhe në dokumentarin e saj të fundit në Netflix.

Në reflektim mbi zgjedhjet e së shkuarës, Beckham pranoi se stili i saj i viteve ’90 dhe fillimit të viteve 2000 shpeshherë ishte rezultat i presionit dhe kërkimit për një identitet të ri pas shpërthimit të karrierës muzikore.

“Ato veshje dhe imazhe ishin pjesë e një procesi kërkimi, një fazë që më ndihmoi të kuptoj kush doja të isha realisht”, shtoi ajo.

Sot, Victoria Beckham është një emër i konsoliduar në industrinë e modës, me një markë të suksesshme që vlerësohet nga kritikët dhe ndiqet nga emra të njohur në gjithë botën.

Transformimi i saj, nga një ikonë pop-i në një personalitet të fuqishëm të modës, shënon një rrugëtim të rrallë që pak artistë kanë arritur me kaq sukses.