Me 2.06 promilë alkool voziti në kah të kundërt në autostradën Gostivar-Tetovë, arrestohen edhe dy pasagjerë

Një ngjarje e rrezikshme është regjistruar në magjistralen Gostivar–Tetovë, ku një shofer po qarkullonte në drejtim të kundërt nën ndikimin e alkoolit, raporton Tetovasot.

Pas një denoncimi të qytetarëve, policia ndërmori masa dhe në pikën e pagesës rrugore në Tetovë ndaloi një automjet “Shkoda” me targa të Tetovës. Gjatë kontrollit u konstatua se drejtuesi B.O. (33) nga Dobroshti kishte 2.06 promilë alkool në gjak, pas së cilës u arrestua.

Sipas policisë, gjatë ndërhyrjes edhe dy pasagjerët, A.J. (27) nga Nerashti dhe N.A. (38) nga Dobroshti, u sollën në mënyrë agresive dhe fyen punonjësit e policisë gjatë kryerjes së detyrës zyrtare. Edhe ata u privuan nga liria.

Të tre janë mbajtur në stacionin policor dhe pas dokumentimit të rastit do të përballen me parashtresa përkatëse, raporton Tetovasot.