Minçev: Administratë publike të departizuar, profesionale dhe evropiane

Ministri i Administratës Publike, Goran Minçev, mori pjesë në konferencën ndërkombëtare “Partneriteti për Reforma: Dialogu Ministror Ballkani Perëndimor – Italia”, që u mbajt në Romë. Në panelin kushtuar reformës së administratës publike dhe integrimit evropian, ai prezantoi prioritetet kryesore të Qeverisë: administratë profesionale, efikase dhe transparente si shërbim ndaj qytetarëve dhe bartëse e vlerave evropiane.

Eventi, i organizuar nga Ministria Italiane e Administratës Publike, Shkolla Kombëtare e Administratës së Italisë (SNA) dhe Shkolla Rajonale e Administratës Publike (ReSPA), mblodhi së bashku ministra nga rajoni, përfaqësues të lartë nga institucionet evropiane dhe ekspertë në fushën e administratës publike.

Në konferencë, siç u njoftua nga Ministria, iu drejtuan Ministri Italian i Administratës Publike Paolo Zangrillo, Presidentja e Shkollës Kombëtare të Administratës Paola Severino dhe Drejtoresha e ReSPA-s Maja Haxhiska-Trendafilova.

Në fjalimin e tij, Ministri Minçev prezantoi prioritetet kryesore të reformës së Qeverisë në fushën e administratës publike dhe theksoi drejtimin strategjik të vendit në procesin e integrimit evropian.

“Qëllimi ynë është të ndërtojmë një administratë efikase, profesionale dhe transparente që do të jetë një shërbim i vërtetë për qytetarët dhe një bartëse e vlerave evropiane”, theksoi Minçev.

Ministri iu referua gjithashtu kuadrit të ri ligjor për shërbimin publik, duke theksuar se tre ligjet e reja sistemike hedhin themelet për një model modern dhe evropian të menaxhimit të burimeve njerëzore.

“Përmes ligjeve të reja, po krijojmë një sistem merite të bazuar në profesionalizëm, kompetencë dhe integritet. Qëllimi ynë është një administratë që do të funksionojë sipas rregullave, jo përjashtimeve”, theksoi Minçev.