Miloshoski: Komisioni Hetimor ka për qëllim të zbulojë pa përzgjedhje të gjitha lëshimet për të gjitha tragjeditë dhe të parandalojë ato

Në seancën e sotme parlamentare foli deputeti i VMRO-DPMNE-së, Antonio Miloshoski, i cili theksoi se Komisioni Hetimor ka për qëllim të zbulojë të gjitha lëshimet për tragjeditë e viteve të fundit që rezultuan me viktima njerëzore, ndërsa gjetjet do t’i dërgohen Qeverisë dhe Prokurorisë Publike për të përcaktuar nëse ka përgjegjësi politike ose penale.

“Kjo Komision Hetimor paraqitet për shkak të seriozitetit të tragjedive që ndodhën vitet e fundit – aksidenti në diskotekën në Koçan, aksidenti i ‘Besa Trans’, Spitali Modular në Tetovë dhe aksidenti i ‘Durmo Tours’ në Laskarci. Qëllimi është të shqyrtohen të gjitha lëshimet dhe mendoj se këto tragjedi, të cilat u paguan me jetë njerëzish të pafajshëm, kanë një emërues të përbashkët: mungesë funksionaliteti në shumë institucione, joefikasitet i sistemit dhe drejtues që krijuan një situatë të rrezikshme e cila rezultoi me 138 viktima. Qëllimi është që çdo gjetje të dërgohet te Qeveria dhe Prokuroria, që mund të ndihmojë në përcaktimin e përgjegjësisë politike dhe penale”, tha Miloshoski.

Ai theksoi se është e domosdoshme që të mos ketë selektivitet në shqyrtimin e të gjitha ngjarjeve tragjike, me qëllim të identifikimit objektiv të mungesave sistemore dhe gjetjes së zgjidhjeve.

“Me votimin dhe formimin e një Komisioni të tillë Hetimor, ne si deputetë dhe si Kuvend do të tregojmë se nuk veprojmë në mënyrë selektive. Këto katër ngjarje tragjike, që kanë shkaktuar dëm të pariparueshëm për familjet dhe shtetin, nuk duhet të shqyrtohen veçmas, por si një tërësi, në mënyrë që të japim rekomandime reale për përmirësimin e mangësive sistemore”, tha ai.

Miloshoski i bëri apel edhe deputetit dhe kryetarit të LSDM-së, Venko Filipçe, që të mbështesë këtë Komision Hetimor, i cili do të shqyrtojë jo vetëm rastet aktuale, por edhe të gjitha tragjeditë e tjera.

“Prandaj, përveç këtyre 75 deputetëve që kanë nënshkruar, dua t’i bëj thirrje edhe deputetit Venko Filipçe, si kryetar i opozitës dhe si propozues i nismës së ardhshme, të japë mbështetje për këtë Komision Hetimor, i cili nuk përjashton asnjë ngjarje tragjike, përkundrazi i shqyrton të gjitha — si ato aktuale, ashtu edhe ato që ndodhën në kohën kur Filipçe ishte pjesë e qeverisë”, tha Miloshoski dhe shtoi:

“Po të votojmë së bashku për një Komision të tillë pa selektivitet dhe me të njëjtin nivel empatie, do të kemi më shumë gjasa të arrijmë në rekomandime dhe përfundime që do t’i shërbejnë të gjithë shtetit dhe do të mundësojnë korrigjime sistemore për të ulur rrezikun e tragjedive të tilla në të ardhmen.”