Ministri Klekovski në Komitetin Rajonal të OBSH-së në Kopenhagë: Parandalimi dhe shëndetësia digjitale janë ndër prioritetet e Maqedonisë

Ministri i Shëndetësisë, Sasho Klekovski, po merr pjesë në sesionin e 76. Komitetit Rajonal të Organizatës Botërore të Shëndetësisë (OBSH) për Evropën, që po mbahet në Kopenhagë. Në këtë sesion, ministrat e shëndetësisë nga vendet e Rajonit Evropian po shqyrtojnë disa raporte dhe propozime për punën e ardhshme të OBSH-së. Gjashtë kandidatët për drejtor të përgjithshëm të Organizatës prezantuan gjithashtu programet e tyre.
Në fjalën e tij, ministri Klekovski theksoi se sfidat me të cilat përballet vendi ynë janë të përbashkëta për të gjithë rajonin. Ndër to janë ndryshimet demografike, plakja e popullsisë, barra në rritje e sëmundjeve jongjitëse dhe largimi i profesionistëve shëndetësorë.
„Investimi në shëndetësi është investim në zhvillimin ekonomik dhe social. Prandaj, transformimi digjital është një nga prioritetet tona më të rëndësishme kombëtare. Synojmë një sistem shëndetësor më të ndërlidhur, më efikas dhe më transparent“, deklaroi ministri Kleçovski.
Ai theksoi se po aq i rëndësishëm është forcimi i kujdesit shëndetësor parësor, me theks te parandalimi dhe zbulimi i hershëm i sëmundjeve jongjitëse, përfshirë edhe kancerin. Në fushën e parandalimit, Ministria po intensifikon zbatimin e ndalimit të pirjes së duhanit dhe po përgatit masa për pijet e ëmbëlsuara.
Ministri përmendi edhe prioritetet e tjera: përmirësimin e qasjes në barna, mbrojtjen financiare të pacientëve, modernizimin e legjislacionit dhe sigurimin e financimit të qëndrueshëm të shëndetësisë.
Ministri Klekovski falënderoi OBSH-në, veçanërisht Zyrën e OBSH-së në Shkup, për mbështetjen e vazhdueshme teknike dhe partneritetin në zbatimin e reformave të sistemit shëndetësor.